၈ ဩဂုတ် ၂၀၂၆
ဖက်ဒရယ်ဒီမိုကရေစီပြည်ထောင်စုပေါ်ထွန်းရေးဦးဆောင်ကောင်စီ၏ မဟာဗျူဟာနှင့် မူဝါဒရေးရာ ဦးဆောင်အဖွဲ့ နှင့် စစ်မဟာဗျူဟာ ပေါင်းစပ်ညှိနှိုင်း ကွပ်ကဲရေးကော်မတီတို့သည် ပူးတွဲအစည်းအဝေးတရပ်ကို ၂၀၂၆ ခုနှစ်၊ ဩဂုတ်လ ၇ ရက် မြန်မာစံတော်ချိန် နံနက် ၁၀:၀၀ နာရီတွင် အွန်လိုင်း (Online) စနစ်ဖြင့် အောင်မြင်စွာ ကျင်းပပြုလုပ်ခဲ့ကြသည်။
အစည်းအဝေးတွင် စစ်မဟာဗျူဟာပေါင်းစပ်ညှိနှိုင်းကွပ်ကဲရေးကော်မတီ ပူးတွဲ ဥက္ကဋ္ဌ (၂)ဦး၊ အတွင်းရေးမှူး(၁)ဦးနှင့် တွဲဖက်အတွင်းရေးမှူး(၂)ဦးတို့ကို ရွေးချယ်တာဝန်ပေးအပ်ခဲ့ပါသည်။
အစည်းအဝေးသို့ ဖက်ဒရယ်ဒီမိုကရေစီပြည်ထောင်စုပေါ်ထွန်းရေးဦးဆောင်ကောင်စီ မဟာဗျူဟာနှင့် မူဝါဒရေးရာ ဦးဆောင်အဖွဲ့မှ ခေါင်းဆောင်များ ၊အတွင်းရေးမှူးအဖွဲ့ဝင်များနှင့် စစ်မဟာဗျူဟာ ပေါင်းစပ်ညှိနှိုင်း ကွပ်ကဲရေးကော်မတီအဖွဲ့ဝင်(၁၀)ဦး တက်ရောက်ခဲ့ကြပြီး ရှေ့ဆက်လက်ဆောင်ရွက်မည့် လုပ်ငန်းစဉ်များ၊ မဟာဗျူဟာမြောက် ပန်းတိုင်များကို ပေါင်းစပ်ညှိနှိုင်း၍ ထိရောက်စွာ အကောင်အထည်ဖော် ဆောင်ရွက်သွားရန် သဘောတူညီခဲ့ကြသည်။
အစည်းအဝေးတွင် ဖက်ဒရယ်ဒီမိုကရေစီပြည်ထောင်စုပေါ်ထွန်းရေးဦးဆောင်ကောင်စီ အလှည့်ကျသဘာပတိ ခူဦးရယ်လ်က အဖွင့်အမှာစကားပြောကြားကာ၊ တွဲဘက်ညှိနှိုင်းရေးမှူး Salai Ram Kulh Cung က အခမ်းအနားမှူးအဖြစ်ဆောင်ရွက်ခဲ့ပါသည်။ ထို့နောက် ဆွေးနွေးမှုများအပြီးတွင် စစ်မဟာဗျူဟာပေါင်းစပ်ညှိနှိုင်းကွပ်ကဲရေးကော်မတီ ပူးတွဲ ဥက္ကဋ္ဌ (၂)ဦးက နိဂုံးချုပ်စကားများအသီးသီးပြောကြားခဲ့ပြီး အစည်းအဝေးကို အောင်မြင်စွာ ရုတ်သိမ်းခဲ့ကြပါသည်။