နွေဦးဖွံ့ဖြိုးရေးဘဏ် (SDB) သည် စတင် ထူထောင်သည့်အချိန်မှ စ၍ ကမ္ဘာတဝန်းရှိ တော်လှန်ပြည်သူများ အား ယုံကြည်မှု (Trust) ၊ လုံခြုံမှု (Security) ၊ လွတ်လပ်မှု (Freedom) တို့ကို အခြေခံ၍ တော်လှန်ရေး အကျိုးပြု ဝန်ဆောင်မှုများ ဆက်လက်ပေးအပ်ရန် ခိုင်မာစွာ ကတိသစ္စာ ပြုထား သည့်အတိုင်း ပြည်သူ့ အင်အားဖြင့် တော်လှန်ရေးကာလ၏ စိန်ခေါ်မှုများကို ကြံ့ကြံ့ခံ ကျော်လွှားရင်း တိုးတက်ခိုင်မာစွာ ရပ်တည်လာခဲ့သည်မှာ ဇူလိုင်လ ၂၂ ရက်နေ့တွင် (၃) နှစ်တင်းတင်း ပြည့်မြောက်ခဲ့ပြီ ဖြစ်ပါသည်။
(၃) နှစ်တာ ကာလ အတွင်း Spring Development Bank (SDB) သည် အသုံးပြုသူပေါင်း (၆) သိန်း နီးပါး နှင့်တကွ Transaction ငွေကြေးလွှဲပြောင်းမှုပမာဏ စုစုပေါင်းတန်ဖိုး အမေရိကန် ဒေါ်လာ ၂.၄၅ ဘီလီယံ ခန့် ရှိသည့် အခြေခံ ဘဏ်လုပ်ငန်းဝန်ဆောင်မှုများ၊ ပြည်သူ့ရန်ပုံငွေမြင့်တင်ရေး အစီအစဥ်များ၊ ပြည်တွင်းပြည်ပ မိတ်ဖက်လူထု ကွန်ရက်များအကြား လုံခြုံလွတ်လပ်သော အစားထိုး ငွေကြေးဝန်ဆောင်မှုများကို လက်တွေ့ကျကျ ပိုမိုတိုးချဲ့ ဆောင်ရွက်လာနိုင်ခြင်းသည် လူထုအောင်ပွဲ၊ တော်လှန်ရေး အောင်ပွဲသာ ဖြစ်ပါသည်။
ဤခရီးစဉ်တွင် စုစုပေါင်း အမေရိကန်ဒေါ်လာ ၂၅ သန်းကျော်ခန့်အထိ တခဲနက် ဝန်းရံဝယ်ယူခဲ့ကြသည့် နွေဦးဖွံ့ဖြိုးရေးဘဏ် (SDB) ၏ SDB Token ရောင်းချမှု ICO Round 1 နှင့် Round 2 ရင်းနှီးမြှုပ်နှံမှု အစီအစဥ်များက အစပြု၍ ၂၀၂၅ နိုဝင်ဘာလ တွင် ကမ္ဘာကျော် နိုင်ငံတကာ အိတ်ချိန်းတခုဖြစ်သော MEXC ပလက်ဖောင်းတွင် တရားဝင် စျေးကွက် စာရင်းဝင်ရောက်နိုင်ခဲ့ခြင်း ကဲ့သို့သော တိုးတက်မှု မှတ်တိုင်များစွာ လည်း စိုက်ထူနိုင်ခဲ့ပါသည်။
အဆိုပါ တော်လှန်ရေးခရီးစဉ်တွင် နိုင်ရာဝန်ထမ်း၍ ယုံယုံကြည်ကြည် အသုံးပြုသူ မိဘပြည်သူများ၊ ဘဏ္ဍာရေးဝန်ဆောင်မှုများကို ရှေ့တန်းမှ သက်လုံကောင်းစွာဖြင့် ဆောင်ရွက်လျက်ရှိသော RM များ၊ မိတ်ဖက် အဖွဲ့အစည်းများ နှင့် နောက်ကွယ်မှ မောင်းနှင်ပေးနေသည့် SDB အဖွဲ့သားများ အားလုံးကို လေးနက်စွာ ဦးညွှတ်ဂုဏ်ပြုအပ်ပါသည်။
နွေဦးဖွံ့ဖြိုးရေးဘဏ်အနေဖြင့် “ဖက်ဆစ်ဝင်ငွေ ဖြတ်တောက် ၊ ပြည်သူ့ဘဏ္ဍာ တည်ဆောက်” ဟူသော မဏ္ဍိုင် (၂) ရပ်ကို ဗဟိုပြုကာ လက်ရှိ ပထဝီနိုင်ငံရေး ၊ စီးပွားရေး အကျပ်အတည်း အခင်းအကျင်းများအား ပြည်သူလူထုနှင့်အတူ ရင်ဆိုင်အံတုရင်း တော်လှန်ရေး ပန်းတိုင် ရောက်သည်အထိ မဆုတ်မနစ် ဆက်လက် ရှင်သန် ရပ်တည်သွားမည် ဖြစ်ကြောင်း ထပ်လောင်း ကတိပြုအပ်ပါသည်။
ဦးတင်ထွန်းနိုင်
ပြည်ထောင်စုဝန်ကြီး
စီမံကိန်း၊ ဘဏ္ဍာရေးနှင့် ရင်းနှီးမြှုပ်နှံမှု ဝန်ကြီးဌာန
အမျိုးသားညီညွတ်ရေးအစိုးရ